نورة شافت في رؤاها
طيرة تطرش لي جناها،
حيطة تتكشّم، تبسّم
في وِشي الزول البناها.
جات تفسّر لي رؤاها،
جوها تاني بي وراها،
وقالوا جَنّت وما براها،
وجنّها الكافر صلّاها،
صلّاها بنارو وكواها،
قطع جليدها
حرق حشاها.
قال المخدّر:
جوها تاني بي وراها،
Valium
فاليوم فاليومين،
تترا وسايكلين،
بستم بِستَمين،
يطلعو ماكلين،
وينزلو شاربين،
والمكنة تشيل،
وتقسّم بي الراحة.
قال المتاتي:
كن عرفتن نورة إنتن،
قولن إنتن كن عرفتن،
نورة ياتا؟
قومن إنتن: يالله تاتا،
وتاتن إنتن: يالله تاتا،
أقدلن إنتن،
وتِلَن أيدكن في المتاتا.
ويالله تاتا،
وتاتا تاتا،
جزمة باتا بي رباطها،
يا حلاتها في المتاتا.
يالله تاتن، تاتن إنتن،
تِلَن أيدكن،
تاني تاتا،
وتاتا تاتا.
وقال المتبتب:
تبتبا، تبتبا، تبتب،
باكر تعرف تقرا وتكتب،
وياما ترتّب.
وقال المهدهد:
هدهدا، هدهدا، هدهد،
اكتبي، اكتبي ألف المد،
حمام وسلام وسعادة بجد،
سرير وعصير وعبير ينشم.
اكتبي، اكتبي واو المد،
حقول وعقول تقرا المجهول،
كتاب الغد.
وقال المجرّب:
جربها، جربها، جرب،
لو صحيح غنّينا بالدمعة الحزينة،
لو دموع الفرحة ما لاقت غُنانا،
بكرة نرجع تاني للكلمة الرحيمة،
شان هنانا،
شان مُنانا،
شان عيون أطفالنا ما تضوق الهزيمة.
التعليقات مغلقة، ولكن تركبكس وبينغبكس مفتوحة.