الحرب في السودان ما بقت مجرد معارك بين أطراف متنازعة ولا مجرد تقدم وتراجع في الميدان
الحرب جابت البلاء للشعب السوداني وخلّت ملايين الناس بين نازح ولاجئ وفقير وجائع ويتيم وفاقد لأهله وبيته ومصدر رزقه
بيوت اتدمرت وأسر اتشتت وأطفال حُرموا من التعليم وناس ماتت وناس اتعذبت وناس اتصفّت وناس لسه بتدفع ثمن حرب ما عندها فيها ناقة ولا جمل
وفي وسط كل المعاناة دي بنسمع أصوات بتقول إن الحل في الدعاء والتوبة والاستغفار والرجوع إلى الله
ونحن ما مختلفين مع الكلام ده لأن الدعاء عبادة والاستغفار مطلوب والتوبة واجبة والرجوع إلى الله أمر ما فيهو خلاف
لكن السؤال البحتاج إجابة
كيف نطلب من الله يرفع عننا البلاء ونحن في نفس الوقت بنطالب باستمرار الحرب
كيف نرفع يدينا للسماء ونقول يا رب فرجك ورحمتك ونحن بنصفق لمشاهد القتل وبنفرح بموت السودانيين وبنطالب بمزيد من المعارك
كيف نتحدث عن التوبة ونحن مصرين على مواقف بتساهم في استمرار الدم والخراب
ربنا سبحانه وتعالى قال
إن الله لا يغير ما بقوم حتى يغيروا ما بأنفسهم
وقال سبحانه وتعالى
ولا تعاونوا على الإثم والعدوان
وقال كمان في شأن الاقتتال
وإن طائفتان من المؤمنين اقتتلوا فأصلحوا بينهما
يعني ربنا أمر بالإصلاح وما أمرنا نغذي الكراهية ونزيد نار الحرب اشتعال
والرسول صلى الله عليه وسلم قال
المسلم أخو المسلم لا يظلمه ولا يسلمه
وقال
من لا يرحم لا يرحم
طيب وين الرحمة لما زول يفرح بموت زول تاني لمجرد اختلافه معاهو في الموقف أو الانتماء
ووين التقوى لما نبرر قتل الأسرى وتعذيب المعتقلين وتصفية الناس وانتهاك حرمات البيوت
نحن ما بنقول الدعاء ما بنفع ولا بنقلل من قيمة التوبة والاستغفار لكن بنقول إن الدعاء ما مفروض يكون غطاء لمواقفنا الخاطئة
التوبة ما مجرد كلام باللسان التوبة كمان إنك تراجع نفسك وتوقف الظلم وتكف أذاك عن الناس
والتوكل على الله ما معناه نقعد نتفرج على الكارثة ونرفض أي محاولة لوقف الحرب
والأهم من ده كله إن الدعوة لوقف الحرب ما معناها ننسى حقوق الضحايا أو نعفي المجرمين من المحاسبة
من حق الضحايا يعرفوا الحقيقة ومن حقهم يشوفوا العدالة ومن حق كل زول ارتكب جريمة يتحاسب بالقانون مهما كان موقعه أو الجهة البينتمي ليها
لكن العدالة ما معناها نستمر في قتل ناس جدد كل يوم
والسلام ما معناهو التنازل عن الحقوق
يا جماعة الخير السودان ما ناقصو مزيد من الموت ولا مزيد من الخراب ولا محتاجين نثبت لبعض منو المنتصر ومنو المهزوم على حساب أرواح المواطنين
المواطن السوداني داير يعيش بس
داير يأكل ويشرب ويأمن على نفسو وأهلو ويفتح بيتو ويرجع شغلو وأولادو يمشوا المدارس والنازح يرجع بيتو واللاجئ يرجع وطنو
فخلونا نسأل نفسنا سؤال مهم
هل نحن فعلاً عايزين الفرج من الله ولا عايزين ربنا يحقق لينا انتصار على حساب دماء بعضنا
هل نحن مستعدين نراجع مواقفنا ونوقف خطاب الكراهية ونقبل بالسلام العادل ولا عايزين الدعاء يكون بس عشان الطرف البندعمو ينتصر
ربنا ما أمرنا بالظلم ولا أمرنا بسفك الدماء ولا أمرنا نتمسك بالحرب ونرفض الإصلاح
عايزين ندعي ربنا يرفع البلاء عن السودان وفي نفس الوقت نشتغل عشان نوقف أسباب البلاء
اللهم ارفع البلاء عن أهل السودان وارحم موتانا واشف جرحانا وأطعم جائعنا وآمن خائفنا ورد النازحين واللاجئين إلى ديارهم
لكن يا رب كمان أصلح حالنا وأصلح ضمائرنا واهدينا لطريق السلام والعدل والرحمة
لأنو ما معقول نطلب من الله يوقف الحرب ونحن مصرين نواصلها.
Prev Post
Next Post
التعليقات مغلقة، ولكن تركبكس وبينغبكس مفتوحة.